Wala pa rin sa pupuntahan
Tila ba'y pangakong huwad
Sinasabing tuwid na daan
Bugbog na katawan at paa
Walang pangalan, walang mukha
Gumagapang lamang papunta
Sa bibig ng mga buwaya
Kay tagal nang palakad-lakad
'Di rin naabot ang pangarap
Kahirapan ang siyang tumambad
Hustisya't di pa rin nahanap
Ang bibig kanilang tinakpan
Ang mga mata'y piniringan
Mga kamay ay ginapusan
Hinataw at pinahirapan
Kay tagal nang palakad-lakad
Pinaasa sa pagbabago
Lamang pa rin ang awtoridad
Talo ang masang Pilipino
Nilinlang, ipinagkanulo
Kinulong, tinago, kinitil
Binenta, nilason, niloko
Kalayaa't boses siniil
Kay tagal nang palakad-lakad
Sa kanilang pagkagahaman
Tayo ang nagbabayad
Sila nama'y nagpapayaman
Kay tagal nang palakad-lakad
Dinaya at pinagnakawan
Inabuso't iniwang hubad
Ngunit patuloy sa paglaban
0 comments:
Post a Comment